O Bloque Nacionalista Galego propón a posta en marcha dunha gran Semana da Literatura en Vigo. Con motivo do Día Internacional do Libro, a fronte nacionalista demanda máis compromiso do Concello coa promoción da lectura e un maior apoio ao sector editorial e ás librarías da cidade.

“Vigo ten todas as condicións para se converter na grande cidade galega do libro”, reivindicou a concelleira do BNG, Ana Martínez, quen trasladou unha batería de propostas na Comisión Informativa de Cultura celebrada este pasado luns para que o Goberno municipal teña “máis audacia e altura de miras” nesta materia.

Chamou nese sentido a potenciar “como se merece” a actual Feira do Libro, poñendo fin ao “maltrato e abandono” dos últimos anos. Pediu tamén que o Concello convoque un certame literario municipal e promova a organización dun Forum Editorial, con vocación internacional nomeadamente cara á lusofonía, que permita poñer Vigo no mapa mundial da edición e a literatura.

“De pouco serve gabarnos do vizoso sector editorial de Vigo ou das grandes autoras e autores que temos na cidade, se ese orgullo non se traduce en políticas públicas que potencien e acheguen os libros como a grande porta de acceso á cultura que son”, puxo en valor a concelleira nacionalista. “Temos que darlle un xiro ás políticas municipais coas que o Goberno de Caballero avanzou na desertización cultural da maior cidade de Galiza”, defendeu.

Martínez lembrou que na cidade tiveron e teñen a súa sede as principais editoriais galegas, e tamén selos de menor tamaño pero de vangarda que desenvolven un papel fundamental para dinamizar e alentar as nosas letras. “Vigo fomos o berce do rexurdimento da literatura galega e fomos  a cidade onde un 17 de maio de hai 161 anos se imprimiu por vez primeira o poemario Cantares Gallegos de Rosalía de Castro”, asegurou, poñendo en valor da urbe como importante polo na creación e edición literaria.

Sen novas bibliotecas dende 2011

A falla de compromiso do Concello coa promoción da lectura queda evidenciada, a xuízo do BNG, no feito de que o Goberno de Abel Caballero non teña aberto ningunha nova biblioteca dende 2011, cando se inaugurou a Neira Vilas no Calvario por impulso do Bloque. En troca, a edil nacionalista lamentou que o único que se promoveu nos últimos anos son “presuntas salas de lectura nas que non hai nada para ler, sen libros, sen persoal bibliotecario e sen ningunha actividade”. Reiterou nese sentido a necesidade de despregar unha rede municipal de bibliotecas que atenda a todos os barrios e parroquias.