O BNG de Vigo rexistra unha declaración institucional contra a guerra na Ucraína
A fronte nacionalista pide o apoio unánime do Pleno municipal para condenar a invasión rusa, esixir o inmediato cesar o fogo, expresar a solidariedade co pobo ucraíno e polo retorno ás vías diplomáticas como único camiño para a paz.
O Bloque Nacionalista Galego vén de rexistrar unha proposta de declaración institucional no Concello de Vigo contra a guerra na Ucraína. A fronte nacionalista pide o apoio unánime do Pleno municipal para condenar a invasión rusa, esixir o inmediato cesar o fogo e a retirada das tropas rusas, expresar a solidariedade co pobo ucraíno e polo retorno ás vías diplomáticas como único camiño para lograr a paz.
“Esta proposta do BNG é absolutamente coherente coa posición firme que, desde un primeiro momento, sostivemos en oposición a este novo conflito armado. É unha proposta para dar unha resposta rotunda de rexeitamento a esta guerra inxusta, que só provoca o sufrimento dos pobos”, explicou o concelleiro do BNG en Vigo, Xabier P. Igrexas.
O edil nacionalista chamou ao resto de forzas políticas da Corporación local a apoiar esta declaración que “quere ser a expresión dun contundente non á guerra, sen ningún tipo de pero nin matiz” e que, asegurou, recolle “o sentir maioritario da sociedade viguesa que ve con arrepío o que está a suceder na Ucraína”.
Igrexas reiterou o compromiso da fronte nacionalista cos seus principios pacifistas, antimilitaristas e antiimperialistas porque “as armas nunca son a solución a nada”. Nese sentido, criticou os “discursos miserábeis” –en alusión a diferentes intervencións públicas por parte de PP e PSOE– nas últimas semanas por “utilizar unha cuestión tan grave para atacar con absolutas mentiras e de maneira partidista ao BNG”.
A declaración rexistrada polo Bloque consta de cinco puntos:
- Condenar a agresión de Rusia a Ucraína e mostrar a total solidariedade co pobo ucraíno.
- Esixir un inmediato alto o fogo e a retirada das tropas rusas do territorio ucraíno.
- Solicitar respecto para o dereito internacional, os dereitos humanos e os Acordos de Minsk, e que se traballe pola resolución do conflito no marco da ONU e da OSCE.
- Demandar o retorno á vía diplomática como única fórmula para resolver as diferenzas para acadar acordos de paz duradeiros.
- Apoiar e colaborar nas medidas de axuda humanitaria que se decidiren para facer fronte á crise de persoas refuxiadas.
