O Bloque Nacionalista Galego (BNG) propón converter Vigo na grande cidade do libro de Galiza coa celebración cun Fórum Internacional Letras da Lusofonía. Co gallo do Día do Libro, a fronte nacionalista pide cooperación entre o Concello e a Xunta para desenvolver esta iniciativa, que busca promover a edición literaria e fortalecer os lazos culturais e comerciais cos países lusófonos.

Así o presentou este mércores a concelleira do BNG de Vigo, Ana Martínez, poñendo en valor a longa tradición literaria da cidade así como a súa localización estratéxica para conectar co mundo lusófono. “A proximidade lingüística e histórica entre o galego e o portugués ofrécenos unha oportunidade única para estabelecer pontes culturais e comerciais”, salientou.

A concelleira do Bloque chamou a desenvolver unha iniciativa cultural “potente desde o orgullo da nosa lingua” que sitúe Vigo como referente internacional do libro, diante dun mercado editorial como o lusófono con máis de 270 millóns de falantes en todo o mundo, cunha importante diversidade cultural e cunha produción literaria en clara expansión.

“Este Fórum Internacional Letras da Lusofonía serviría para promover a edición literaria e fortalecer os lazos culturais entre Galiza e os países lusófonos, nun amplo espazo de dialogo, intercambio e colaboración entre profesionais do sector editorial, autoras, tradutoras e o público en xeral”, defendeu.

Martínez lamentou o do “desprezo” que, denunciou, demostran os Gobernos galego e municipal pola cultura e a literatura malia o papel histórico de Vigo como berce do libro en Galiza. “Somos a cidade que alberga os principais selos editoriais, cunha ampla tradición literaria e grandes autoras e autores, o lugar onde se publicou 'Cantares gallegos' de Rosalía de Castro, obra fundacional do Rexurdimento das letras galegas”, destacou.