En reacción ás declaracións do alcalde de Vigo, Abel Caballero, nas que anunciaba publicamente unha estimación da indemnización económica que lle podería corresponder percibir a Vitrasa, como concesionaria do servizo de transporte urbano na cidade, a causa da redución do mesmo pola crise do coronavirus, o BNG de Vigo demandou do Goberno municipal que actúe para esixirlle a empresa que garanta as medidas preventivas nos buses e defenden que se abra o debate sobre a remunicipalización do servizo.

“O que debera ocupar e preocupar ao alcalde e ao Goberno municipal de Vigo é esixir de maneira firme que Vitrasa aplique as máximas garantías preventivas tanto do persoal condutor como das persoas viaxeiras”, reclamou o concelleiro do Bloque na cidade olívica, Xabier P. Igrexas. “As imaxes destes días de buses ateigados até a bandeira e as denuncias constantes do Comité de Empresa sobre os incumprimentos de Vitrasa das medidas para evitar novos contaxios por coronavirus, son o que debera ocupar e preocuparlles, en troca de se dedicar a calcular canto diñeiro público máis haberá que transferirlle a esta empresa privada”, acrecentou.

“Non pode ser que un servizo municipal, que custa moitos millóns de euros das viguesas e dos vigueses, non estea a cumprir coas medidas de prevención e as garantías sanitarias en medio dunha pandemia”, reprochou o portavoz municipal nacionalista.

Remunicipalización

Para o BNG esta situación, na que o Concello podería ter que aboar unha indemnización millonaria a Vitrasa, evidencia de maneira clara o “pésimo negocio” que para a cidade representa o modelo de concesións privadas. “A xestión privada de servizos públicos esenciais, como o transporte urbano, é un pésimo negocio para a cidade, para a cidadanía e unicamente unha fonte de lucro para grandes empresas privadas”, cuestionou Igrexas.

O edil nacionalista defendeu que “é momento de abordar a serio a necesidade de remunicipalizar este servizo”. Neste sentido, a fronte nacionalista lembrou que o PSOE impuxo no regulamento do transporte de viaxeiros da cidade que este servizo só se poida xestionar por unha empresa privada, após rexeitar unha emenda do Bloque que abría a posibilidade de que fora xestionado de maneira directa polo Concello ou a través dunha empresa pública. “Nós seguiremos a defender, como fixemos sempre, que o público é servizo e que o privado é beneficio só para uns poucos”, e por iso demandan “audacia” para “devolver ao público o que nunca debeu ser xestionado desde o privado”.

Aliás, o BNG xa expresou nos dous últimos plenos municipais a súa preocupación e disconformidade con que Vitrasa poida ser indemnizada polo Concello ao tempo que se lle permite, ao amparo dunha normativa irracional do Goberno español e coa aprobación da Xunta, que aplique un ERTE que supón un brutal recorte salarial do seu persoal.