Serafín Otero e Manuel G. Moreira consideran “inadmisible” que haxa pacientes de prioridade 1 agardando até seis horas en urxencias

Os candidatos nacionalistas convidan á cidadanía a participar no acto de presentación de propostas sanitarias que terá lugar mañá no hotel Axis ás 20.15 horas

Vigo, 10 de marzo de 2015.- O cabeza de lista, Serafín Otero, e o candidato 3, Manuel G. Moreira, expresaron a preocupación do BNG polo novo “atasco” nas urxencias do Meixoeiro, que ao seu xuízo é unha “clara mostra da situación da sanidade de Vigo”. Segundo destacaron, esta situación é “consecuencia directa” das políticas de recortes que o PP acomete tanto en recursos como en persoal.

Os nacionalistas denunciaron que na última noite algúns pacientes con prioridade 1, é dicir que segundo o protocolo non deben agardar máis de unha hora, tiveron que agardar até seis horas. “Trátase dunha situación moi grave e absolutamente inadmisible”, subliñaron.

Segundo manifestou González Moreira, médico de familia, resulta preocupante que a estas alturas “xa só nos chame a atención estes graves picos de saturación en urxencias, cando a que consideramos como xornada normal presenta xa dun grao de traballo moi alto”. “Temos un nivel moi alto de tolerancia coa saturación”, engadiu.

Pola contra, Otero e Moreira defenderon que “outra sanidade é posible”, tal e como explicarán nun acto que se desenvolverá mañá ás 20.15 horas no hotel Axis, e que tamén contará coa participación do portavoz nacional, Xavier Vence, e as candidatas número 2 e 6, Vitoria Iglesias e Lola Rodríguez, respectivamente.

Falta de recursos en atención primaria

“Pensamos que desde o goberno da Xunta e desde o Concello se poder tomar moitas medidas imprescindibles para mellorar a situación da sanidade”, asegurou Manuel G. Moreira. Neste sentido defendeu o desenvolvemento dun plan concreto “para subsanar as listas de espera e a falta de recursos en atención primaria”.

Preguntado polas medidas que se poden executar desde o Concello, Moreira explicou que se pode facer un “diagnóstico da saúde da cidadanía” e reclamar os recursos sanitarios necesarios en función dos constantes cambios demográficos. “Non podemos deixar en mans máis alonxadas a planificación da sanidade”, sinalou.

Folga en Povisa

Por outro lado, os candidatos nacionalistas visitaron ás traballadoras e traballadores de Povisa que hoxe iniciaron a folga de fame en protesta polos últimos despedimentos anunciados. “Desde o Bloque queremos trasladarlles o noso apoio ás súas reivindicacións laborais”, destacou Serafín Otero.

“O Sergas debería garantir as condicións laborais dunha empresa coa que asina un convenio e que recibe fondos públicos”, afirmou González Moreira, quen subliñou asemade que o Sergas tamén debería garantir a “calidade asistencias aos pacientes que atende Povisa”.

Segundo destacou Manuel G. Moreira, é un grave problema asistencial que Povisa teña os ratios de persoal por debaixo dos hospitais públicos. “Problema que o Sergas debería solucionar con urxencia”, reclamou. “No que atinxe aos celadores é escandaloso”, asegurou.