Xabier Alonso critica o “culebrón mediático” protagonizado polo alcalde e o presidente da Deputación sobre a remodelación do estadio

Vigo, 12 de setembro de 2014.- O concelleiro do BNG, Xabier Alonso, defendeu a necesidade de reformar o estadio de Balaídos “para garantir a seguridade” das persoas. Porén, criticou que esta actuación se está convertendo nun “novo culebrón” porque a Xunta e a Deputación teñen o obxectivo xeral de non investir en Vigo e ao alcalde só lle interesa saír nos medios e a liorta permanente.

“Cómpre preguntarse se este proxecto é necesario e no BNG pensamos que si”, destacou o edil nacionalista, quen tamén salientou que a remodelación de Balaídos debe ter en conta melloras no barrio no que está ubicado. Neste sentido defendeu que a actuación que se leve a cabo “debe permitir disfrutar do entorno á veciñanza e solucionar o problema do aparcamento”.

Ao respecto, e preguntado sobre as solución previstas para o aparcamento na zona, o edil do BNG comentou que o único que está contemplado é “unha cascada de información que non aparece en ningún proxecto real e concreto”. “Demandamos que a actuación na zona sexa global, algo que non se está contemplando”, salientou.

Para O BNG, outro aspecto que necesariamente debe incluír o proxecto é a remodelación das pistas de atletismo. Neste sentido Xabier Alonso asegurou que sofren un deterioro “igual ao do estadio” e considerou que nelas debe actuar a Xunta posto que, ademais de adquirir o compromiso no pasado, compiten atletas que non son só de Vigo, senón da área metropolitana e incluso de toda Galiza.

“Agora que a Xunta ten cartos, é hora de acometer a súa remodelación, resolvendo así dunha vez por todas a súa situación”, demandou o concelleiro nacionalista. “Cómpre pensar globalmente”, insistiu.

Proxecto definido

Xabier Alonso subliñou que é necesario definir o proxecto así como as administracións participantes, que para o Bloque deben ser todas; isto é, Concello, Deputación, Xunta e Consejo Superior de Deportes, así como o propio Celta. “É preciso ter definidos os prazos de execución das obras e a aportación de cada administración”, engadiu Alonso, ao tempo que manifestou que no BNG “non nos gusta como se está levando este tema”.

Por outro lado, e en resposta aos medios sobre a postura que manterá o Bloque no pleno en caso de que sexa obxecto de votación, Alonso asegurou que “o que nunca fará o BNG é detraer cartos destinados a cubrir necesidades sociais para Balaídos, pero se non é así si apoiaremos a reforma porque pensamos que é necesario garantir a seguridade das persoas que van ao estadio”.