O portavoz municipal do BNG, Santi Domínguez, acusou este xoves aos concelleiros do PP de “non facer oposición” ao goberno local e de ser “unicamente” delegados da Xunta e do goberno central, polo que lles instou a pedir á Xunta investimento para políticas de emprego. Asemade lembrou ao alcalde que “aínda non ten os votos dos tres concelleiros do BNG para aprobar os orzamentos”.

Tras criticar que o alcalde se comparase con Obama, Santi Domínguez asegurou que o BNG poucas leccións sobre humanizacións pode recibir, ao ser o Bloque quen comezou as peonalizacións en Vigo coa clara oposición de PP e PSOE. Porén o nacionalista asegurou que o debate non está en “humanización si ou non”, senón que o eixo do problema é como saír da crise.

Gasto desproporcionado

Considerou dubidoso que os millóns gastados en humanizacións supoñan a creación de 2.400 postos de traballo, polo que instou a que alguén diga onde están as 2.400 persoas que atoparon emprego grazas as obras. “Que nos digan onde están”, indicou ao respecto. Ademais cualificou de “desproporcionado” o gasto realizado nas humanizacións, “tendo en conta que o alcalde só contemplaba pouco máis de un millón de euros para o Plan de Emprego”, engadiu.

O portavoz municipal nacionalista destacou, por outro lado, que que “o único certo” é que paro aumenta na cidade, superando as 34.000 persoas en situación de desemprego, e a enquisa de poboación activa apunta que tamén hai desemprego nos sectores relacionados coas humanizacións. “Pero as persoas que consiguen emprego grazas ao Plan Municipal de Emprego si está aí e se poden comprobar no parque de Santa Cristina”, defendeu.

Emprego e servizo sociais

Referíndose ás manifestacións de Caballero, o nacionalista recoñeceu que é certo que o PSOE ten 11 concelleiros e concelleiras na Corporación viguesa “E pode seguir presumindo o que queira, pero quero recordarlle que con só 11 concelleiros non sería alcalde”, indicou ao respecto.

“O alcalde ten que ter en conta que aínda non ten os votos para aprobar os orzamentos e que ten que conseguilos. Para iso debe presentar unhas contas que prioricen o emprego e os servizos sociais. De non ser así, non os terá”, destacou o portavoz municipal do BNG.

Desorientación do PP

Por outro lado, e en referencia ás declaracións dos populares, Domínguez criticou a súa “desorientación”, xa que segundo considerou “non acaban de darse conta de que son concelleiros de Vigo”. Cualificou ademais a súa actitude de “paradóxica”, ao criticar uns días ao goberno porque os gastos para humanizacións son excesivos “e outros a nós por pedir que se aumenten as partidas para xenerar emprego”.

Afondando nesta cuestión asegurou que o PP debería calarse “ por vergonza política”, xa que as súas políticas de recortes provocan a situación desesperada de moitas familias. “Resulta paradóxico que sexa o BNG quen se esforza para dar solucións aos problemas que precisamente o PP xenera coas decisións que toman no goberno central e galego”, comentou.

BNG na oposición

Reinvindicou asemade o papel do Bloque na oposición, ao ser quen de que o goberno local se poña “as pilas”. Neste sentido asegurou que se fora polo Partido Popular o goberno municipal non tería destinado case 6 millóns ao Plan Municipal de Emprego nin tería incrementado as partidas de servizos sociais. “A labor da oposición non é criticar por criticar, senón facer propostas positivas para a cidade”, comentou neste sentido. Defendeu ademais que o BNG defende as políticas que considera que necesarias para Vigo. “E non se preocupen, que non deixaremos que o PP goberne nesta cidade”, rematou.