Iolanda Veloso: “A conclusión clara das eleccións é que a cidadanía castiga o pacto PP-PSOE”

Iolanda Veloso: “A conclusión clara das eleccións é que a cidadanía castiga o pacto PP-PSOE”

A portavoz municipal destaca que mentres o BNG mantén a tendencia á baixa de anteriores citas electorais a baixada dos dous partidos maioritarios é “rechamante”

O responsable local Henrique Viéitez salienta que o Bloque “baixa en votos pero sobe en presenza social e maior achegamento á xente”

 

Valoración resultados europeas 2014 Iolanda VelosoVigo, 27 de maio de 2014.- A portavoz municipal do BNG, Iolanda Veloso, e o responsable local do Bloque vigués, Henrique Viéitez, fixeron a valoración dos resultados electorais da fronte nacionalista na cidade. Segundo subliñaron, das tres forzas políticas con representación municipal “o castigo máis forte é o que sofren PP e PSOE”, polo que a “conclusión clara” en Vigo das eleccións celebradas o pasado domingo é o rexeitamento ao bipartidismo

“Cando analizamos uns resultados electorais vemos que non é o mesmo manterse nunha tendencia, e o BNG mantén a tendencia á baixa, que ter unha baixada rechamante de 10 ou 17 puntos”, manifestou Iolanda Veloso. Neste sentido, destacou que eses resultados indican o rexeitamento “ao acordo entre PP e PSOE para aplicar as políticas de recortes que tanto están castigando á cidadanía”.

A voceira nacionalista sinalou que a perda de aproximadamente 2.000 votos do BNG na cidade se corresponde coa tendencia dos últimos resultados electorais. Porén, considerou que de ese descenso “non se pode deducir que o BNG sufra un castigo explícito por unha posición determinada”, en relación ao papel do Bloque como única oposición ao goberno de Caballero.

Basta xa ás políticas de recortes

O responsable local, pola súa banda, asegurou asemade que dos resultados electorais en Vigo se desprende un “basta xa” ás políticas de recortes e austeridade que emanan da Unión Europea e que son aplicadas polos gobernos do Estado e a Xunta de Galiza.

Obxectivo: ter presenza en Bruxelas

Henrique Viéitez, ademais, salientou que o BNG acadou o resultado de ter presenza en Bruxelas, pese as dificultades coas que se atopou a fronte nacionalista ao longo da campaña. Mencionou ao respecto o recorte da presenza do BNG nos medios públicos galegos tras o recurso presentado por UpyD.

Valoración resultados europeas 2014

Recuperación interna

Por outro lado, e como elemento positivo da campaña electoral, destacou a “recuperación do BNG no plano interno”. Explicou que, pese a partir dunha situación “nada fácil”, notouse o esforzo da militancia no desenvolvemento da campaña, “austera e sufragada polos propios militantes”. Neste sentido apuntou que o Bloque foi capaz de mobilizar a máis de cen persoas para traballar ao longo da campaña.

“Recuperamos o compromiso da militancia que facía anos que non notabamos”, apuntou, ao tempo que asegurou que ao seu xuízo “aínda que baixamos en votos subimos en presenza social e maior achegamento á cidadanía”.

Traballo no Concello

“Tomamos nota de que a cidadanía viguesa non quere o pacto entre PP e PSOE”, destacou Iolanda Veloso, quen avanzou que en consecuencia, o BNG seguirá mantendo a mesma posición de “defensa dos intereses das persoas que máis necesitan o apoio das administracións”.

Neste sentido recordou que pacto acadado en Vigo entre PP e PSOE responde unicamente a intereses partidistas “porque ven a ameaza que supón a proposta e o discurso de outras forzas, polo que tentan frealas”. Ao respecto sinalou que “para o BNG son tremendamente prexudiciais para a cidadanía porque non resolven en absoluto os seus problemas”, como acontece coas axudas de emerxencia.

 

Iolanda Veloso: “A conclusión clara das eleccións é que a cidadanía castiga o pacto PP-PSOE”