Tras a nova suspensión da sesión plenaria, a portavoz municipal do BNG, Iolanda Veloso, calificou de “inaudito” que o alcalde se desentenda do problema das persoas que protestaron no pleno para defender o seu posto de traballo. A nacionalista subliñou ademais que o BNG non vai permitir que se desenvolvan as sesións a porta pechada.

“O alcalde ten que asumir as súas responsabilidades políticas e arranxar o conflito”, afirmou Iolanda Veloso. Para a nacionalista, a solución non pasa por impedir a entrada no pleno das persoas que protestaron na sesión anterior. Nesta liña explicou que un informe xurídico do secretario do pleno deu lugar a unha resolución de Alcaldía impedindo a entrada ás persoas responsables da interrupción do pleno do luns. “Pero está claro que este método non funciona”, salientou.

Para a portavoz municipal nacionalista, a solución pasa por “xestionar este problema”, ao tempo que asegurou que o problema “de orixe” radica en que non se tomaron as medidas axeitadas para solucionalo. Ao seu xuízo, esta situación “non ten que darse”, e o alcalde “ten que responsabilizarse dos problemas que se dan dentro do Concello que goberna”.

Preguntada pola posibilidade de que o alcalde convoque a nova sesión a porta pechada, Iolanda Veloso asegurou que o BNG non o vai permitir, “ao igual que onte no Parlamento galego”, engadiu.