Olaia Fernández Davila subliña que boa parte das partidas propostas polo Bloque, 2.054 millóns de euros en total, buscan superar os recortes

Iolanda Veloso destaca que as propostas para Vigo e a súa área, máis de 4,3 millóns, demandan melloras na conexión ferroviaria e a biblioteca do estado

Vigo, 31 de outubro de 2014.- A deputada do BNG, Olaia Fernández Davila; a portavoz municipal, Iolanda Veloso; e o responsable local, Henrique Viéitez, presentaron as emendas propostas polo Bloque aos orzamentos xerais do Estado. As partidas presentadas, que ascenden a 2.054 millóns de euros, “están destinadas a aumentar a protección social e a calidade do ensino e a sanidade, ademais de avanzar na calidade de vida das persoas”, segundo salientou a deputada nacionalista.

Olaia Fernández criticou que o goberno estatal manteña o mesmo nivel de austeridade para 2015. “Pese a que diga que España crece, os orzamentos non aumentan”, sinalou, ao tempo que subliñou que as emendas presentadas polo BNG teñen o obxectivo tamén de “superar a situación de recortes”.

Deste xeito, explicou que 282 millóns van destinados a educación, cunha partida importante para aumentar as bolsas; 270 millóns son para o Ministerio de Traballo, cunha partida de 120 millóns para impulsar políticas activas de emprego. Considerou tamén fundamental aumentar as partidas destinadas a reactivación dos sectores industriais, como o naval e as enerxías renovables.

Aumento da partida para o Marco

A deputada do BNG fixo referencia a outras dúas iniciativas presentadas. Unha delas busca “mellorar a calidade da vida democrática”, segundo explicou, ao reclamar de 250 xuíces. A outra, pola súa banda, reclama ao Ministerio de Cultura, o aumento da partida orzamentaria ao museo Marco.

Neste sentido Fernández Davila recordou que nos últimos dous exercicios o Ministerio de Cultura reduciu considerablemente a súa aportación ao museo vigués, con 48.000 euros para 2014 e 35.000 euros consignados para 2015. Segundo resaltou, esta situación levou ao BNG a presentar unha proposición non de lei, na que se insta ao goberno a incrementar a súa achega, e unha batería de preguntas nas que se demandan explicacións sobre este descenso.

Construción dunha área loxística en Peinador

A portavoz municipal, pola súa banda, destacou que nas emendas parciais para Vigo e a súa comarca, que suman 4,3 millóns, o Bloque reclama ao Ministerio de Fomento diversos estudos para mellorar as conexións ferroviarias da cidade. Así, pídese analizar a mellora da conexión con Portugal e coa Plisan, pero tamén a implantación dun plan de proximidade e de unión do porto coa estación do AVE e o aeroporto.

Ademais, Iolanda Veloso destacou a necesidade de “dotar de recursos a Peinador”, polo que se inclúe unha partida para construír unha área loxística nas inmediacións do aeroporto. “Tal e como recolle o PXOM”, especificou a preguntas dos xornalistas. Asemade, salientou a inclusión dunha emenda “histórica da cidade”, como é a que se refire á construción da biblioteca pública do estado, con 1,5 millóns de euros.

O responsable local do Bloque asegurou que todas as partidas propostas son “prioritarias e fundamentais”, en tanto que a súa posta en marcha permitiría non só impulsar os sectores produtivos contemplados, senón tamén ter en conta outros.