O portavoz municipal do BNG, Santi Domínguez, reclamou ao goberno local “que force á empresa Vitrasa a sentarse a dialogar cos traballadores e traballadoras para chegar a un acordo”. Ao seu xuízo, é responsabilidade do goberno “protexer por riba de todo os traballadores e traballadoras das concesións das distintos servizos municipais”.

Santi Domínguez considerou que nun servizo fundamental para a cidadanía como o de transporte público, o goberno municipal “non pode mirar para outro lado”. Pola contra defende que debe esixir á empresa que se sente a negociar e acadar un acordo rápido que garanta condicións dignas aos seus empregados e empregadas e a volta á normalidade do servizo.

O portavoz municipal nacionalista lembrou que o BNG vén reclamando dende hai meses que esta empresa concesionaria ten que facer “algún tipo de sacrificio” como así o fixeron outras concesionarias que prestan servizos no Concello de Vigo, posto que se trata dunha “concesión millonaria que reporta á empresa beneficios millonarios”. Neste sentido Santi Domínguez recordou que o ano pasado Vitrasa incrementou a súa tarifa por rifa do IPC e aplicou a subida do IVE.

Segundo afirmou o portavoz do BNG, as peticións que reclamaman os empregados e empregadas de Vitrasa son “razoables”. Ademais defende que se axustan “ao mínimo que deben esixir nuns tempos como os actuais, nos que os recortes e as políticas económicas repercuten negativamente no poder adquisitivo do conxunto dos traballadores e traballadoras e nos seus dereitos laborais”.

Solidariedade cos traballadores

O Bloque quere mostrar a solidariedade e apoio aos empregados e empregadas de Vitrasa. Neste sentido o portavoz municipal nacionalista salienta que “é tempo de definirse claramente a prol dunhas novas políticas económicas e dunha nova distribución da riqueza”. Tamén defende que cómpre rexeitar ás políticas económicas e de emprego “que cargan sobre a clase traballadora os efectos da crise económicas da que non é culpable”, explicou.

“É tempo de que as concesionarias que obteñen importantes beneficios e que se sustentan cos cartos dos vigueses e viguesas empecen a ser máis xenerosos e accedan ás peticións razoables dos traballadores e traballadoras”, indicou. A tal efecto Santi Domínguez sinalou que esta mañá foille trasladado un escrito ao alcalde solicitándolle a súa mediación para solventar este conflito.