O candidato do BNG critica a incapacidade de Caballero para dialogar cos colectivos sociais da cidade

Vigo, 19 de febreiro de 2015.- O candidato do BNG á alcaldía de Vigo, Serafín Otero, destacou que a colocación esta madrugada do barco Bernardo Alfageme na rotonda de Coia, despois de tres meses de conflito veciñal e cun gran despregue policial, é unha “clara mostra do autoritarismo do alcalde, unha actitude que pensamos que xa pertencía a outros tempos”.

Serafín Otero criticou ademais que o alcalde utilizase as forzas de seguridade “para cumprir os seus caprichos” e sexa “incapaz e dialogar cos colectivos sociais e os partidos políticos”. Neste sentido asegurou que o alcalde é “xordo e cego”. Ao seu xuízo é xordo en tanto que é “incapaz de dialogar cos diferentes colectivos sociais, como o de Coia e cos partidos políticos da cidade”.

“O alcalde tamén é cego porque non ve as necesidades da cidadanía”, asegurou o candidato nacionalista, en referencia á súa ineficacia na xestión dos servizos sociais municipais ao non priorizar o benestar da veciñanza e evitar o aumento das situacións de emerxencia social e pobreza enerxética.

Talente antidemocrático

Ademais, para Otero, Caballero amosa o seu “talante antidemocrático” ao non respectar os acordos plenarios. Neste sentido fixo referencia ás dúas mocións aprobadas no pleno vigués sobre o Bernardo Alfageme, unha presentada polo PP e a segunda polo BNG. “É inaudito que o alcalde desprece totalmente as decisións tomadas democráticamente pola corporación viguesa”, manifestou.