Cos votos a favor de BNG e PP e a abstención do PsdeG, o pleno vigués aprobou a proposta nacionalista de iniciar o expediente de retirada da Medalla da cidade a Fernández Gayoso. Segundo defendeu a portavoz municipal nacionalista tendo en conta a súa xestión ao fronte de Caixanova e posteriomente de Novacaixagalicia “manter esta distinción non ten sentido”, senón que o BNG reclama a súa retirada “por dignidade”.

Iolanda Veloso desglosou as razóns que levan ao BNG a pedir a retirada da distintión, concedida en 1997 cos votos a favor de PP e PSOE. Entre elas destacou a comercialización das preferentes e as subordinadas e a súa conduta á fronte da entidade bancaria, co cobro dun plan de pensións “cando a entidade que dirixía xa recibira inxentes axudas públicas”, e a súa imputación por administración desleal e apropiación indebida por parte da Fiscalía anticorrupción.

“Non podemos ser condescendentes cos delincuentes de colo branco e intolerantes cos máis febles”, subliñou a portavoz municipal do BNG, quen asegurou que é “insoportable” que se indulte a banqueiros e se impulse a amnistía fiscal mentres continúan os desafiuzamentos e hai xente que se suicida. “Xa non aturamos máis que se gasten os cartos da educación dos nosos fillos e fillas en darllos aos bancos que logo pechan o colexio no centro”, engadiu.

Tras a intervención do portavoz socialista, López Font, quen anunciou a presentación dunha emenda para esixir responsabilidades a todos os responsables da emisión das preferentes, Iolanda Veloso destacou que a do BNG é unha moción “clara, concreta e concisa”. Ao seu xuízo, falar de outros asuntos é “desviar a atención, non querer entrar no debate e que os principais responsables saian de rositas”.

Segundo explicou a portavoz nacionalista, nesta moción o BNG pide “unha decisión política, non unha sentenza xudicial”. En resposta ao documento presentado polo grupo socialista, Iolanda Veloso considerou que “decisión sumarísima é botar a unha familia á rúa”, non pedir a retirada da Medalla da Cidade a Gayoso.

“Por dignidade pedimos que se retire a Medalla a Gayoso”, reiterou a portavoz do BNG, para quen unha cuestión fundamental de honorabilidade é respectar á cidadanía, “sen esquecer que o PSOE indultou a un banqueiro e agora o Tribunal Supremo dixo que non era válido”.

Segundo o acordo adoptado pola corporación, ábrese o expediente de retirada da distinción a Fernández Gayoso, que será levada ao vindeiro pleno extraordinario de elección de Medalla da Cidade e Vigueses Distinguidos para o presente ano para a súa aprobación.