Olaia Fernández cualifica ao ministro Gallardón de “absolutamente inxusto” porque alonxa a xustiza das persoas

Vigo, 7 de abril de 2014.- A deputada do Congreso, Olaia Fernández; a deputada no Parlamento galego, Carme Adán; a portavoz municipal, Iolanda Veloso; e o responsable local, Henrique Viéitez, subliñaron a radical oposición do Bloque ao anteproxecto de Lei Orgánica de Poder Xudicial. Neste sentido, o responsable local nacionalista que “debe haber unha resposta de ampla base social contra esta reforma porque nos afecta a todos”.

Viéitez avanzou que o Bloque xa iniciou os contactos cons diversas entidades sociais “e comprobamos o rexeitamento de todas”, asegurou. “O BNG promove que haxa unha resposta conxunta para que a resposta sexa o máis ampla posible”, destacou, ao tempo que considerou que “non só os partidos xudiciais de Vigo e de Tui teñen que responder a este ataque”.

Redución de 41 partidos xudiciais en Galiza

A deputada Olaia Fernández criticou o obxectivo do anteproxcecto de lei, que segundo explicou pretende que en Galiza só haxa un partido xudicial por provincia, pasando dos 45 actuais a 4. “Aprobaron este anteproxecto sen negociar e sen diálogo cos estamentos da xudicatura”, criticou Davila.

Segundo denunciou a deputada nacionalista, o ministro Gallardón “traballou neste anteproxecto facendo ouvidos xordos ás demandas sociais”, polo que ao seu xuízo demostra unha “total incapacidade para o diálogo”. Ademais, considerou que Gallardón é “totalmente inxusto para a cidadanía”. Ao respecto criticou que a reforma impulsada polo PP “alonxa a xustiza das persoas, incluso fisicamente” e “vai en contra dos intereses da cidadanía”.

Iniciativas do BNG

“Preguntarémoslle a Gallardón se vai respectar a proposición non de lei aprobada”, sinalou Fernández Davila, a respecto do acordo que acadou co PP o pasado mes de decembro e aprobado por unanimidade para que “na elaboración do proxecto de lei de reforma da Demarcación e Planta se teñan en conta as especificidades xeográficas, sociais e económicas propias das diferentes comunidades autónomas, de modo que se deseñe unha estrutura organizativa xudicial flexíbel, moderna e especializada, en coordinacións coas CCAA con competencias transferidas, a sala de goberno dos Tribunais Superiores de Xustiza e o Consello Xeral do Poder Xudicial”.

Pola súa banda, a deputada Carme Adán avanzou que o BNG tamén presentará diversas iniciativas no Parlamento galego contra este anteproxecto de lei e instando á Xunta a que defenda o partido xudicial de Vigo.