O Bloque Nacionalista Galego afea a negativa do PSOE de Abel Caballero a despregar unha batería de medidas para avanzar cara un Vigo máis verde e sustentábel a nivel medio ambiental. Así o criticou este luns o portavoz municipal do BNG, Xabier P. Igrexas, durante o debate no Pleno municipal dunha moción socialista sobre esta materia que foi obxecto dunha emenda nacionalista.

“Esta moción é unha provocación e unha broma pesada”, manifestou Igrexas en relación á proposta do PSOE, lembrando as numerosas eivas e actuacións contrarias ao medio ambiente por parte do Goberno de Caballero. Lamentou nese sentido o “arboricidio diario do alcalde leñador”, en relación ás tallas inxustificadas que se repiten na cidade, e a “política de brazos caídos” diante das reiteradas denuncias de vertidos no río Lagares.

O portavoz nacionalista acusou tamén o alcalde de “vandalizar” cada ano os xardíns históricos e catalogados da Alameda coa instalación do chamado Cíes Market “en beneficio só dunha empresa privada” así como de ser “abandeirado do turismo de masas por terra, mar e aire” malia os seus impactos na cidade. 

“O único cambio no zoo foi o do seu nome”, criticou Igrexas en relación a outro dos puntos da moción, insistindo na urxencia de abandonar o actual modelo exhibicionista. E recordou ademais como o Goberno local promove dous viais, a ampliación da A-52 e a PO-010, que ameazan con tronzar o rural da cidade e con graves impactos ambientais, como quere impoñer unha “moi mala copia de Madrid Central” para a implantación das Zonas de Baixas Emisións, e como está volver encher dun novo paseo de formigón o areal de Samil.

Anel verde e reconversión do zoo

Fronte a este contexto, dende o BNG defenderon no Pleno unha batería de alternativas para un Vigo máis verde con actuacións tanto da Xunta de Galiza como do propio Concello, que foron tombadas polos socialistas. “Con toda a nosa xenerosa cooperación, trasladamos estas propostas para darlle a oportunidade aos Gobernos de Caballero e Rueda de rectificar”, afirmou Igrexas.