O Bloque Nacionalista Galego levará ao vindeiro Pleno do Concello de Vigo unha moción diante da situación de emerxencia lingüística que atravesa o galego e para demandar a adopción de medidas en prol da súa normalización.

O portavoz municipal do BNG de Vigo, Xabier P. Igrexas, argumentou esta iniciativa asegurando que “os recentes datos feitos públicos polo Instituto Galego de Estatística sobre coñecemento e uso do idioma galego constatan a situación crítica que está a atravesar a nosa lingua”. 

“Esta situación limite en ámbitos como a cidade de Vigo (onde o uso preferente ou exclusivo do galego reduciuse a apenas o 15% da poboación) e que podemos cualificar en termos xerais de emerxencia lingüística, é consecuencia dunha política lingüística galegófoba, discriminatoria e excluínte aplicada nos últimos quince anos de goberno do Partido Popular na Xunta da Galiza” acrecentou.

No concreto, citou que neste período prohibiuse a impartición en galego de varias materias no sistema educativo (caso único en Europa), eliminouse practicamente o acceso das crianzas á lectoescritura en galego na rede de escolas infantís,  mudouse a lei da función pública para que o funcionariado non teña por que ter coñecemento do galego para atender ás persoas, ou desapareceu a oferta da programación infantil ampla e actualizada na TVG, entre outras moitas medidas contra o galego na administración, na xustiza, no audiovisual e medios de comunicación, ou nas actividades comerciais e económicas.

“As consecuencias están á vista: o galego non só descende bruscamente no uso habitual, perdendo a súa condición de lingua máis falada na Galiza, senón que mesmo se descoñece nas franxas de idade máis novas: o 32,4% das nenas e nenos entre 5 e 14 anos non son quen de se expresaren en galego, poden entendelo, mais non falalo aínda que queiran, porque non o dominan. “Este é o resultado práctico desas políticas”, resumiu, lembrando que tanto o Consello de Europa como a propia ONU teñen dirixido advertencias á Xunta de Galiza para mudar a actitude sobre o galego.

No entanto, o portavoz municipal nacionalista amosouse convencido de que “a situación do noso idioma é reversíbel”. “O galego ten futuro se o compromiso coa normalización do noso idioma é real e asumido por toda a sociedade, comezando polas institucións galegas. O futuro do galego depende da nosa vontade colectiva como galegos e galegas”, proclamou.

Con ese obxectivo a fronte nacionalista trasladará ao vindeiro Pleno do Concello de Vigo unha moción para abordar a adopción de medidas que permitan a plena normalización da nosa lingua propia.

Apoio real ao galego

Unha moción coa que, en primeiro lugar, queren que o Pleno en coherencia coa vixente ordenanza municipal de normalización lingüística, reiteradamente incumprida polo Goberno de Abel Caballero, reafirme o seu compromiso na defensa da lingua galega, patrimonio colectivo de incalculábel valor, e no seu dereito inalienábel a ser coñecida e usada pola poboación en calquera circunstancia e lugar, sen discriminación de ningún tipo. “Temos que garantir o dereito de todas as viguesas e vigueses, de todas as galegas e galegos, a podermos vivir plenamente no noso idioma”, subliña Igrexas.

Nese camiño, defenderán tamén a necesidade de que Concello revise a súa actuación en materia lingüística atendendo a condición do galego “lingua propia de Galiza” (Estatuto de Autonomía, artigo 5) e como idioma oficial do propio Concello, para despregar esforzos concretos no camiño de efectivizar o previsto na Lei de Normalización Lingüística (1983), e Plano Xeral de Normalización da Lingua Galega (2004).

Ademais, proporán ao Pleno que o Concello de Vigo se adira á Plataforma Cidadá Queremos Galego, entidade social ampla conformada por colectivos de diferentes ámbitos e por persoas a título individual, que nace da vontade de articular unha ampla resposta popular a prol da lingua propia do noso pobo, o galego; de defensa e afirmación dos usos públicos e dereitos lingüísticos xa garantidos pola actual lexislación; e de progresiva normalización naqueles espazos onde o idioma de noso non goza aínda da presenza desexada.

En coherencia con esa decisión queren que o Concello se comprometa a apoiar activamente as iniciativas socias promovidas desde esta plataforma, a principiar pola convocatoria dunha grande manifestación nacional en defensa da lingua o vindeiro 23 de febreiro, Día de Rosalía.